चंद्रपूर : विधी संघर्षग्रस्त बालकांना गुन्हेगारी प्रवृत्तीपासून परावृत्त करून समाजाच्या मुख्य प्रवाहात आणण्यासह पोलीस दलात बालस्नेही वातावरण निर्माण करण्यासाठी चंद्रपूर पोलिसांनी राज्यातील पहिलाच अभिनव उपक्रम राबविला. पोलीस अधीक्षक आयुष नोपानी यांच्या संकल्पनेतून आयोजित दोन दिवसीय कार्यशाळेत २०० बालके व त्यांच्या पालकांचे समुपदेशन करण्यात आले, तर १७५ पोलीस अधिकारी आणि अंमलदारांना बालस्नेही कार्यपद्धतीचे प्रशिक्षण देण्यात आले.
२७ आणि २८ ऑक्टोबर रोजी ही कार्यशाळा पार पडली. पहिल्या दिवशी विधी संघर्षग्रस्त बालके आणि त्यांच्या पालकांसाठी समुपदेशन सत्र आयोजित
२०० बालके व पालकांचे समुपदेशन.
१७५ पोलीस अधिकारी-अंमलदारांना बालस्नेही कार्यपद्धतीचे प्रशिक्षण. करण्यात आले. यावेळी बाल कल्याण समितीच्या अध्यक्षा क्षमा बासरकर, सदस्य ज्योत्सना मोहितकर, अपर पोलीस अधीक्षक ईश्वर कातकडे आणि पोलीस अधीक्षक आयुष नोपानी यांनी मार्गदर्शन केले. मुंबई येथील तज्ज्ञ संतोष शिंदे यांनी बालकांच्या समस्या, कायदेशीर तरतुदी आणि पुनर्वसनातील आव्हानांवर प्रकाश टाकला. प्रथम वर्ग न्यायदंडाधिकारी सीमा लाडसे यांनी बालके व पालकांचे समुपदेशन केले. बालकांचे मानसशास्त्र, गुन्हेगारी पार्श्वभूमी आणि प्रकरणांच्या अभ्यासावरही मार्गदर्शन करण्यात आले. दुसऱ्या दिवशी पोलीस ठाण्यांचे प्रभारी अधिकारी आणि बाल संरक्षण अधिकाऱ्यांसाठी प्रशिक्षण घेण्यात आले. यात बाल न्याय (मुलांची काळजी व संरक्षण) कायद्यातील तरतुदी, बालकांशी संवेदनशीलतेने संवाद साधण्याच्या पद्धती, गोपनीयतेचे पालन आणि पुनर्वसनकेंद्रित तपास यावर भर देण्यात आला.
क्लिनिकल मानसशास्त्रज्ञ मानसी मोरे-नोपानी यांनी बालकांचे मानसशास्त्र आणि समुपदेशनात्मक दृष्टिकोनाचे महत्त्व स्पष्ट केले. क्षमा वासरकर यांनी बालहक्क व बाल कल्याण समितीच्या कार्यपद्धतीविषयी, तर वरिष्ठ नॅचरोपॅथी प्रशिक्षक ओंकार हालमोरे यांनी पोलीस कर्मचाऱ्यांच्या शारीरिक व मानसिक आरोग्याविषयी मार्गदर्शन केले. पोलीस उपअधीक्षक (मुख्यालय) अर्जिंक्य तांबडे यांनी आभार मानले.